أنا بوجه السنين اللي خذت من عمري أفراحه
صغير السن لكنها حمولي من السنين كبار
ذبل وجه الفرح فيني و تعبت أدور الراحة
تموت أحلامي قدامي ولا ألقى لهالزمان أعذار
يغافلني الزمان الين ما تلحقني أرماحه
و عقرب ساعتي واقف على وقت الحزن ما دار
محد قبلي سلم منه فتن آدم بتفاحة
عشان أعيش في راحة خذا مني أماني كثار
غدى حالي مثل طير كسير و فاقد جناحه
مكانه فوق لو همه كسر جنحانه وما طار
أنا اللي لو يطول الليل و تغزي عتمته الساحة
تلألأ نجمي و اتماديت بأحلامي و زدت إصرار
أنا اللي واجه الدنيا و صبره كان مفتاحه
كسر خشم الحزن يوم أن دمه من زمانه فار
يا وقتي اللي مضى واللي سرق من عمري أفراحه
صغير السن صح بس بشموخي ما أهاب كبار
وأنا بوجه السنين اللي خذت من عمري أفراحه
صغير السن لكنها حمولي من السنين كبار