hebben joe zin in n lekker dagje oet
n beetje zwemmen en n broenverbraande snoet
kom din geliek noar Termunterziel achter diek
zaten joe vrouger ook wel ains an t Spieksterstraand
al hadden joe doar toun net as hier n haile bult zaand
t is gain vergeliek mit Termunterziel achter diek
t is net t boetenlaand
vergeleken bie Spieksterstraand
t is de Côte d'Azur van t Noorden
dus wil je lekker pootjeboaden
stap op fiets of neem traain vanoet Stad
dij begunt subtiel moar din schait e as n piel
via Beem Steem Loppersom en Daam noar Delfziel
en din is t moar eefkes biegoan mit bus
as Pelleboer zegt: het wordt strandweer, dus:
mit de haile kliek noar Termunterziel achter diek
moar as ik joe was zol ik wel
eerst even opzuiken in tabel
of t nou eb is dan wel vloud
joa dat liekt mie wel zo goud
want bie eb is dij Eems doar verrekte smaal
din is der naargens wotter
en vertel mie welke lodder
gaait nou kilometers klaauwen
deur de braggel en de modder
om te zwemmen
mor t verhoal wordt aans bie vloud
en is boetendes t weer n beetje goud
kom din geliek noar Termunterziel achter diek
(c) tekst: P. de Haan / muziek: R.W. Troup