Hans:
Habt's es scho g'hört, vom gruaba da bua
Hot g'moant er fandat sonst koa ruah
Wann er net amoi ins fuiz eini geh daad!
Sei freindin woit mit, de hot eam vertraut
Eam seiba war's z'wieda, wei er auf sie schaut.
Aba sie hot g'moant im fuiz aloa warad's z'fad.
Oiso hot er's mitgnomma, eini sans ganga
Und scho hod ebbs wahnsinnigs olle zwoa g'fanga!
Sie warn zwar zu zwoat, aba d' angst werd schlimma.
Wos dann bassiert is woas koana so g'nau,
Ma hot moi wen schrein g'hert, dann war d'nacht wieda grau
Aba aussakemma sans bis heit nimma!
Blasius:
Und vom maier da oid, der hot oft vazäit
Das's im fuiz drin ebbs gibt, grausam und wäid,
Häuser de's doch ned gibt und gruam ohne bom
Sogar bäse geister bei de baama obm drom!
Hans:
As fuiz is lewendig und bäs no dazua!
Am wandarer lossts bei da nacht koa ruah!
Untam dog feit si nix, do hot neamand ebbs g'merkt,
Aba bei da nacht ham scho d'baam leit dawürgt!
Blasius:
Und im hausener blattl hob i moi g'lesn,
Im fuiz gibt's väi seltsame wesn:
Irrliachta, drudn, an schraat gibt's soga
Des ham'd scho vui g'sogt, des is g'wis wahr!
Und in de tümpeln, wo's irrliachtal brennt,
Do soit oana hausn, den ma becklmo nennt!
Mei opa hot mir des ois kind oiwei g'sogt
Miche:
Aba ob's wahr is, hot bis heit koana g'frogt!
Des san doch grod g'schichtn zum kinda daschrecka
Des zeig um as fuiz glaab i ned ums varrecka!
Des san doch grod g'schichtn zum kinda daschrecka
Des zeig um as fuiz glaab i ned ums varrecka!