Era de maggio e te cadéano 'nzino,
a schiocche a schiocche, li ccerase rosse.
Fresca era ll'aria, e tutto lu ciardino
addurava de rose a ciento passe.
Era de maggio, i' no, nun mme ne scordo,
na canzone cantávamo a doje voce.
Cchiù tiempo passa e cchiù mme n'arricordo,
fresca era ll'aria e la canzona doce.
E diceva: "Core, core!
Core mio, luntano vaje,
tu mme lasse, i' conto ll'ore.
chisà quanno turnarraje!"
Rispunnev'i': "Turnarraggio
quanno tornano li rrose.
Si stu sciore torna a maggio,
pure a maggio i' stóngo ccá.
Si stu sciore torna a maggio,
pure a maggio i' stóngo ccá."
E só turnato e mo, comm'a na vota,
cantammo 'nzieme lo mutivo antico.
Passa lu tiempo e lu munno s'avota,
ma 'ammore vero, no, nun vota vico.
De te, bellezza mia, mme 'nnammuraje,
si t'arricuorde, 'nnanz'a la funtana.
Ll'acqua, llá dinto, nun se sécca maje,
e ferita d'ammore nun se sana.
Nun se sana, ca sanata
si se fosse, gioja mia,
'mmiez'a st'aria 'mbarzamata,
a guardarte io nun starría!
E te dico: "Core, core!
Core mio, turnato i' só'.
Torna maggio e torna 'ammore,
fa' de me chello che vuó!
Torna maggio e torna 'ammore,
fa' de me chello che vuó!"