familie Van der Wal dij woonde in Den Haag en pa zat bie de PTT
moar dij ging verhoezen en pa mos kaizen tussen mitgoan joa of nee
pa zag t nait zitten, moeke was der tegen, kiender waren der ook nait veur
moar mit n beste premie van PTT der overhin ging t op t leste toch moar deur
hun buurman zee:'wat mouten joe doar nou doun in Grunnen, in zo'n achtergebleven gebied?'
pa zee:'kist mooi lullen, zeg nou zulf wat mout ik aans, aans bin k mien boan joa kwiet'
en doar ging Van der Wal mit familie en al zien pakkelarie noar t Grunnegerlaand
ze waren goud en wel n ketaaier aan de rit of ze waren al in n file beland
doar waren ze wel aan wend, dus ze haren ook wel pland dat ze noa z'n dikke twijehaalf
uur rieden in de buurt van Utrecht zollen wezen aargenswoar op de A-12
zo'n dikke twij moand loater was familie Van der Wal mooi op stee in heur nije hoes
en verdomd as t nait woar is elkenain van familie vuilde zich der al oardig thoes
t hoes haar nog ain gebrek: PTT was wat troag, dus mozzen ze boetendeure bellen
lest har pa ol buurman oet Den Haag an de liene en dit haar-e te vertellen:
"t waark bevalt mie goud hier en zolaang as ik hier woon heb ik nog nooit in n file stoan
astmatische bronchitus van mien dochter is in dizze twij moand zowat haildal overgoan
ik bin net zo snel as doe vanòf hier in Amsterdam en wat mooier is: wie hebben Stad
het is hier lekker rusteg en toch verrek gezellig en ik proat al n beetje plat"
"ast n keer tied over hest din most n keer komen aankakken, din goan we lekker n oavendje stappen
en op zundagmiddag even noar FC Grunnen tou, dij kennen n oardeg balletje trappen
wie hebben hier n beetje rondtuft en nou wait ik wat ze mainen mit Pronkjewail in Golden Raand
al blief k in haart en nieren misschain n echte Hagenees, dit is veur mie het beloofde laand!"