Kırım Yöresi Türküleri - Ketme Balam Ayıptır Lyrics

(Anay kızına ayta)
Şaytan üyi canım kızım mektep degen egerek
Aslı canım kız balaga okuv-yazuv ne kerek
Kalemge katka yazık bir köpten köp tögerek
Özide tap Akmescit'te köyimizge bek erek
Bo yıl şonda ketme kızım anaycıgın cılatıp
Binlermen para masrap etip babannın cebin suvaltıp
Otır üyde kur keryannı ketenlerın agartıp
Aytkanımdan şıkma balam kalkka yüzüm kızartıp
Saga baksan sen okuvnı uşatasın söretke
Cimnastik diy saglamlık diy tırmaşasın terekke
Vazgeş balam küninni coytma bo kereksiz tilekke
Bizler seni nışanladık bek zengin bir erekke
Üstündeki kiygen urban bir marışke kaptanı
Söret yasap keşiresin aynı yılnı aptanı
(H)ak Tanrım bızıldı da kızlarımız erimiz
Yarın akret küni yoktır bizim catar cerimiz
(Kız anasına cevap bere)
Ah yesirlik devrinin kul kurbanı anayım
Senin işin cennemde otlarga men canayım
Yanlışasız aldanasız kucır laplar aytasız
Zemaneni anlamaysız yüz yıl artka kaytasız

Bezdiresiz sizler meni şo nışanlauv sözimen
Menligimni satacaksız üş beş nagış bezimen
Eş biriniz karamaysız maga süygi közimen
Ketme kızım deb aytasız aslı kimnın yüzimen
Men ketermen ayt babamga pötigim yok o alsın
Bonday eski bilgilerni cıyıp cebine salsın
Zemaneni babam endi anlamalı bilmeli
Siz anaylar nafle agızgan köz yaşların silmeli
Bilesiz mi anay biz ne künnerde yaşaymız
Aksız yerge kul etile nafle kötek aşaymız
Curtımıznın ötmeginden el ecnebi tok bola
Bizlerdeki cigitlikler bir sebepsiz cok bola
Ömürimnin son künneşik okıycakman anayım
Men ketenni mektebimde tokıycakman anayım
Bolsa menim nışan toyım mektep işinde bolsın
Bo turışım gür genşligim bilgi ogrında solsın
Okuv üşin beş kıtanı cayav cürüp şıgarman
Cayillikni aksızlıknı temelinden cıgarman
Anayşıgım okımaga ketecekmen ketecek
Bo Kırım'nı bir top şeşek etecekmen etecek