Pange língua, gloriósi
Córporis mystérium,
Sanguinísque pretiósi,
quem in mundi prétium
fructus ventris generósi
Rex effudit Gentium.
Nobis datus, nobis natus
ex intácta Vírgine,
et in mundo conversátus,
sparso verbi sémine,
sui moras incolátus
miro clausit ordine.
In suprémæ nocte cenæ
récumbens cum frátribus
observáta lege plene
cibis in legálibus,
cibum turbæ duodénæ
se dat suis manibus.
Verbum caro, panem verum
verbo carnem éfficit:
fitque sanguis Christi merum,
et si sensus déficit,
ad firmándum cor sincérum
sola fides sufficit.
Tantum ergo Sacramentum
venerémur cérnui:
et antíquum documéntum
novo cedat rítui:
præstet fídes suppleméntum
sensuum defectui.
Genitóri, Genitóque
laus et iubilátio,
salus, honor, virtus quoque
sit et benedíctio:
procedénti ab utróque
compar sit laudatio.