danka oberscht für de marschbefehl
isch nett jo denn dä summer hani sowiso nid vorgah zum weggah
danka dasi minem land entlich öpis dörf zruggeh
danka für spiis und trank
und an riise dank fürs sturmgwehr
doch was het das söle
vo wega disziplin und maniere?
khasch mer jezt salutiera wenni im kriag desertiera?
i waiss daser s gfül hend dass miar die usbildig bruchend
doch bi oi hani nüt nüt würkli nüt glernt
ussert dasi jez waiss was darmee mit irem riise budget macht
dasmer d munition verbrucha muas au wenn mer gar nid schüssa mag
und au ir theorie übr d ufgaba vodr schwiizer armee
hani dr sinn nid ganz gseh
ier wend antworta geh uf terrorismus und di ökologische krisa
mit panzar und patrone
jungs, i wogas zbezwiifla
bezwiifla stark
dasi dem land überhaupt öpis bringa
bin eher überzügt devo
dasi sinnlos milliarda verschlinge
dasi mit stüürgeldar mini ziit verschwenda
dasi meh für da frida mach weni ds geld an dritti spenda
an öper wo zwenig nahrig het, öper wo ad umwelt denkt
und nid amne staat wo jedam bürgar es sturmgwehr schenkt
i glaub eifach nid mini pflicht vor da heimischa fahne
sig 15 wucha uf staatskoschta geischtig verarme
also oberscht, dr nögscht marschbefehl bhaltisch liabar für di
will i verzichta gera uf dini kindischa kriagerlispiil!!