Vooda' pikne vooda'
Härjä atami' anniss
Katõ sarvõga
Nel'lä sõraga
Künni peräst
Külvi peräst
Kae' pikne
Kuimuidu sinnu kaibass maa,
Lahki kujunu'
Kalõss tõmmanu'
Taa maa kos kõik künd kal'g
Taa maa kos kõik külv korõhtanu'
Mii maa
Aa' pikne
Üt's väiku tsäkärki' taiva
Üt's pilvepoigki'
Meil olõss no' loodust sõs
Üles kaiõn
Et vas't nakass no' nur'utama umõtõ
Mii maa pääl
Vooda' pikne vooda'
Härjä atami' anniss
Kõrgõ sälägä
Laja rinnaga
Olõ õi sa' tõist säänest saanu'
Vooda' pikne vooda'
Künni peräst
Külvi peräst
Olõ õi sa' pikne
Joht halv ollu' varõmp
Hää olõt õks ollu'
Meile ja maalõ
Olõ õi meil kahju
Häräst sinulõ
Kui' sa' õnnõ' kaet ja' kullõt
Mii palvit
Vooda' pikne vooda
Härjä atami' anniss
Vooda' pikne vooda
Tulõ' joba kavvõlt tün'nen
Tõrahtõn
Üt's kõrd
Tulõ' joba kavvõlt tün'nen
Tõrahtõn
Tõnõ kõrd
Tulõ' tsilk tsilk
Tsilk tsilk tsilk tsilk
Mürdsähtä' sõs
Õkva kõrva veeren
Mürdsähtä'
Niida et kõik hirmsalõ ehmätäse
Mustast käest musta assa'
Maaha satasõ
Ja puhas süä sehen naarass
Ku' vällän
Suur vesi
Kur'ahtass
Taivast
Äkki
Ala
Vooda' pikne vooda'
Kas mii' sõs pal'lu nõvvami'
Väiku maa
Väiku nurmõ
Sata' pikne sata'
Sata' pikne niida et külänt saass
Meile ja maalõ
Vooda' pikne vooda'
Nurmõ ütlevä' tennu'
Ku' mõõt täüs
Tõuka' sõs muialõ musta' pilve
Suurõ soo pääle
Korgõ konnu pääle
Laja laanõ pääle
Soo mõõt on suurõmp
Konnu mõõt on korgõmp
Laanõ mõõt on lajemp
Simatsõ' ilma'
Mesitse' hohu'
Meile kündjile külvjile põimjile
Hää pikne
Pühä pikne
Hoia' mii nurmõ
Anna' mii rüäle
Hää' olõ' ala'
Hää' pää' otsa
Hää' terä' sisse
Vooda' pikne vooda
Härjä atami' anniss
Valgõ lauk otsa iin
Suur must hand takan
Dieser text wurde 223 mal gelesen.