Gavaudan - Senhor, Per Los Nostres Peccatz Songtexte

Senhors, per los nostres peccatz
Creys la forsa dels sarrazis
Jherusalem pres saladis
Et encaras non es cobratz
Per que manda·l reys de marroc
Qu'ab totz los reys de crestias
Se combatra ab sos trefas
Andolozitz et arabitz
Contra la fe de crist garnitz

Totz los alcavis a mandatz:
Masmutz, maurs, goitz e barbaris
E no·y reman gras ni mesquis
Que totz no·ls aya·n ajostatz
Anc pus menut ayga non ploc
Cum elhs passon e prendo·ls plas
La caraunhada dels milas
Geta·ls paysser, coma berbitz
E no·y reman brotz ni razitz

Tant an d'erguelh selh qu'a triatz
Qu'els cujo·l mons lur si'aclis
Marroquenas, marabetis
Pauzon a mons per mieg los pratz
Mest lor gabon: «franc, faiz nos loc!
Nostr'es proensa e tolzas
Entro al puey totz lo mejas!»
Anc tan fers gaps no fon auzitz
Dels falses cas, ses ley, marritz

Emperaire, vos o aujatz
E·l reys de frans'e sos cozis
E·l reys engles, coms peitavis
Qu'al rey d'espanha secorratz!
Que anc mais negus mielhs no poc
A servir dieu esser propdas
Ab luy venseretz totz los cas
Cuy bafometz a escarnitz
E·ls renegatz outrasalhitz

Jhezus cristz, que·ns a prezicatz
Per que fos bona nostra fis
Nos demostra qu'es dregz camis
Qu'ab penedens'er perdonatz
Lo peccatz que d'adam se moc
E vol nos far ferms e certas
Si·l crezem, qu'ab los sobiras
Nos metra, e sara·ns la guitz
Sobre·ls fals fellos descauzitz

Non laissem nostras heretatz
Pus qu'a la gran fe em assis
A cas negres outramaris
Q'usquecx ne sia perpessatz
Enans que·l dampnatge nos toc!
Portogals, gallicx, castellas
Navars, aragones, serdas
Lur avem en barra gequitz
Qu'els an rahuzatz et aunitz

Quan veyran los baros crozatz
Alamans, frances, cambrezis
Engles, bretos et angevis
Biarns, gascos, ab nos mesclatz
E ls provensals, totz en un floc
Saber podetz qu'ab los espas
Romprem la preyss'e·l cap e·ls mas
Tro·ls ajam mortz totz e delitz
Pueys er mest nos totz l'aurs partitz

Profeta sera·n gavaudas
Que·l digz er faitz. E mortz als cas!
E dieus er honratz e servitz
On bafometz era grazitz